మోదీకి రాహుల్ గాంధీ ఆలింగనం... పార్లమెంటులో కిరణ్ రిజిజు వర్సెస్ ప్రియాంక గాంధీ

పార్లమెంటులో గతంలో ప్రధాని నరేంద్ర మోదీని లోక్ సభలో ప్రతిపక్ష నేత రాహుల్ గాంధీ ఆలింగనం చేసుకున్న ఘటనపై లోక్ సభలో అధికార, విపక్ష నేతల మధ్య మాటల యుద్ధం జరిగింది. లోక్ సభ స్పీకర్ ఓం బిర్లాపై తీసుకొచ్చిన అవిశ్వాస తీర్మానంపై ఈరోజు సభలో చర్చ కొనసాగింది.

ఈ సందర్భంగా కేంద్రమంత్రి కిరణ్ రిజిజు మాట్లాడుతూ, గతంలో రాహుల్ గాంధీ మోదీ వద్దకు వచ్చి ఆలింగనం చేసుకుని వెళ్లి తన సీట్లో కూర్చున్నాడని వెల్లడించారు. ఆ తర్వాత తోటి కాంగ్రెస్ ఎంపీలను చూసుకుని కళ్లెగరేశారని, అలాంటి నేతను ఎప్పుడూ చూడలేదని ఆయన పేర్కొన్నారు.

మోదీని రాహుల్ గాంధీ ఆలింగనం చేసుకోవడంపై కిరణ్ రిజిజు విమర్శలు చేయగా, కాంగ్రెస్ వయనాడ్ ఎంపీ ప్రియాంక గాంధీ తీవ్రంగా స్పందించారు. గత పన్నెండేళ్లలో కేంద్ర ప్రభుత్వానికి దీటుగా నిలిచిన వ్యక్తి రాహుల్ గాంధీయే అన్నారు. అలాంటి నాయకుడిపై విమర్శలు చేస్తున్నారని అన్నారు.